Luxussorge

Strophe 1
Du dänksch, dass är fuu isch doch dr wahr Grund
für sini Armuet isch, dass är nid mit Formular klar chunt
är brücht Hiuf, doch trout sich nid zum frage
würde si ihn uslache oder usschaffe?
was we är schnäu seit, dass är ire Wäut steit
wo nume e Minderheit weiss wo düre z Gäud geit?
Wär är när u hässig oder ufsässig?
schwige isch Goud, de isch doch guet, weme sich druf mässigt.
Si macht ds o u seit, dass si gnue het
obwou si merkt wi ire jedi Rächnig zuesetzt
Si putzt schöni Wohnige wo si nid din wohnt
fürne Lohn wo sich schinbar nid lohnt.
Doch für si scho wou iri Ching di Sprach scho rede,
si hei Kollege u si cha e Dütschkurs belege.
Dr Chrieg isch no i ihrem chopf doch ke angst vorem stärbä
ire maa isch tot doch für ihri Ching chas besser wärdä

Refrain
Du hesch ä Papi wo dir aus zaut
solang es dir gfaut. Nöis Iphone?
Okay es schint eilig
doch uf de Fotis lachsch du schinheilig
u ig dänke mir: läck bisch du arm
Dini Familie cha für jede Luxus sorge
doch dis Läbä besteit us Party u Droge
Du redsch über dini Luxussorge
u ig dänke mir: läck bisch du arm

Strophe 2
Är wett är säuber blibe het är mir verzeut,
doch we är sich nid versteut fingt är ke Lehrsteu.
Är weiss nid witer, zwiflet a sim Wärt
u fingt so si Wäg id Kriminalität
Ize isch är bereit, immer denn wägzsecklä
we irgendwo ä Polizist z gseh wär.
Är hets o scho fasch ufgäh, si Platz ir Gseuschaft z sueche
du gsesch ihn u fluechsch, dass är fuu wär.
Si isch im zwöite Jahr Gymer wo ire Père d Püetz verlürt
Är isch e stouze Mah doch das nütz ihm nüt.
Sini Familie ermuetigt ihn uf z RAV z gah
doch är wott sich es nid igestah 30 Jahr für nüt gschafft z ha.
Iri Eutere stritte sich fasch di ganzi Nacht lang
si ligt näbädran i ihrem Zimmer u list Kafka
Ire Brüetsch verwandlet sich, bis är uf sächs Bei geit
u si hocket vorem Gsetz, wartet uf Grächtigkeit

Strophe 3
Mini Mère het mir mau gseit, dass eim nume schaffe nid viu git
u grad weme weni het, isch z Wichtigste d Biudig.
Si het aube ässä gchouft vo ihrem Trinkgäud
doch isch doch emu besser aus es Läbä wo dr Sinn fäut
Bi o zur Erkenntnis cho, dass weme gnue het es glich isch
dass de weni hesch merksch ersch wede eine triffsch wode rich bisch
Ig gloube o, dass wenn es kene gäb wo d Million wett
es o chum eine gäb wo z weni Lohn het
o dass dr eint odr dr anger uf Öpis verzichte chönt
u sech när meh fröit übr das wo är sich de gönnt
mir chöi üs nüt angers leiste, gniesse ds Ganze hie
vor dr Haue hange, astosse mit Ankerbier
So stöh mir am Strasserand, es louft krasse Punk
u mir diskutiere über Klassekampf
Äbä lang wider ga widerstah odr söttmes äbä lah?
währendesse stossisch du mit Chapanger uf dis läbä a.

Weitere Informationen